ඔබ හෙමින් සැරේ ආවා
ඔබ සැනින් ඉගිල වෙන් වූවා
ආදරේ අර්ථ විරහිත
දුක ශේෂ වන
හිස් වචනයක් කියා
කියාදී නුඹ ගියා
කවදාක කොතැනක හමුවේද අප ආයේ
ඒ මුණ ගැහීමම වේදනාවක් වේවී
දාහයක දැවී සුන්වී යාවී
සුසුම් සිරවී ආයෙ අප මිය යාවී
සුසුම් සිරවී ආයෙ අප මිය යාවී
නුඹ තනා ගිය හිස් අවකාශයේ පාවී
අප සිනාසුණු තැන් වේදනාවෙන් ගයමී
මතක එකිනෙක් මතුව ඒවී
සුසුම් සිරවී ආයෙ මා මිය යාවී
සුසුම් සිරවී ආයෙ මා මිය යාවී
ආදරය නමින් යමක් ඇති බව කියා දී ඔබ යන්න යන වගයි
ආදරය නමින් කිසිවක් නැති බව කියා දී ඔබ යන්න යන වගයි
ආදරයට කළ නොහැක්කක් නැති බව කියා දී ඔබ යන්න යන වගයි
ආදරයට කළ හැක්කක් නැති බව කියා දී ඔබ යන්න යන වගයි
මම තවම නුඹ වෙනුවෙන් තැවෙමි, මග බලන් ඉමි, විඳවමි, නුඹ සුවෙන්දැයි අසමි
නුඹ මා ඇතැර, ගල් වූ හදින්, නෑසූ කන්ව මගේ වේදනාවන් රසවිඳී......
හිත පාර පාරා වේදනාවන් රසවිඳී.......
අතු පතර විහිදුන මහා නුග රුකකි ආදරය
උගුළුවා හල නොහැක අතු පතර කපා හළ මුත් නුඹ තනිවවම
වේදනාබර මතකයන් විටින් විට පාරමින් හද දවන සඳ
නුග රුකෙහි මූළයන් තදින් ඔබ වෙත බැඳී හඬයි තැවෙයි නුඹටවත් නොපෙනෙන ලෙස
අතීතය කියා ඇති යම් කිසි දෙය මහ වේදනාවක් නේද
මට නොකීවට නුඹටත් යන්තමින් හරි ඒ බව දැනෙනවා ඇති නේද
හැකි වුනෝතින් වෙන් කරන්නට යලිත් නොබැඳෙන ලෙස අතීතය සහ වර්තමානය
ඒත් මං හිතන්නෑ විසඳුමක් ඇති බව, අපි වගේ හිතින් හරි බැඳිල ඇති අතීතය සහ වර්තමානය
මෙන්න මෙච්චරක් කියල හරි පෙන්නන්න පුළුවන් උනානන් හදවතේ ඇති වේදනාව
මම දන්නවා ඔය ඇස් පිටුපාන්නෙ නැති බව ආදරය ගාව
ඉඩෝරය මැද මියැදෙන්න පණාදින වේලිච්ච නුග පැලයකට
දිය බිඳක් කියන්නෙම මහමෙරක් තව මොහොතක් හරි ජීවත් වෙන්න
මලක් මෙන් නියඟළා හැඩ පිරුණු
රුව දුටිමි හැඩ දකිමි මන බැඳුණු
විතක් මදු පිරූ විට මෙන් දැනුණු
සුසුමකින් පමණක්ම සිත පිරුණු
බිතක් මත ඇඳි රුවැති අප්සරා
කටු පිරුණු නටුවෙ රැඳි රුව අරා
මුදු සිනිදු පෙති වර්ණ තවරලා
හිමි-අහිමි තිළිණයක සිරකළා
සාංකා පිරී රෑ තරු ගනිම් තනිවම
දෙතොළ රැඳි දුම් රොදක් තනි රකින
දෙතැන හිඳ හදවතින් පෙම් කරන
එකම රිදුමක් නොවෙද හද පෙළන
"ආදරේ කරන්න ඕනෙ කිසි දෙයක් ආපිට බලාපොරොත්තු වෙන්නෙ නැතුව...."
ඔහොම කිව්වට ඇත්තටම එහෙම ආදරේ කරන්න පුලුවන්ද? මාත් ඔහොම කියල ඇති. ඒත්....
අපි කොච්චර ආසද අපි ආදරේ කරන කෙනා අපි ගැන හොයල බලනවනන්, නිතර කතා කරනවනන්, පරිස්සමින් ඉන්නවද බලනවනන්, බේත් ටික බිව්වද අහනවනන්, මතක් කරනවනන්, සතුටින් ඉන්නවනන්, හොඳට ඉගෙන ගන්නවනන්, කිසිම කරදරයක් නැතුව ජීවත් වෙනවනන්.....
ලොකු වටින දේවල්, මිල මුදල් වලින් මනින දේවල් බලාපොරොත්තු නොවුනට ඔය මම කලින් කියපු දේවල් ලැබෙනවට අපි කොච්චර ආසද.
ජීවිතේ කොයිම හරි දවසක මට සතුටු වෙන්න පුලුවන් හැටි තමයි ඒ...., ඒ සේරම නැතත් .... ආදරේ කොතන හරි සතුටින් හිනා වෙලා ඉන්නවනන්, ඒ මට ඇති. මොකුත් ඕනෙ නෑ කිව්වට ඕනෙ නැත්තෙම නෑ. හැමදාම සතුටින් පරිස්සමින් ඉන්න ඕනෙ. ❤️
...... .....
ඉරි තලා සිඳෙන'යුරු මහ පොළොව වුව විටෙක
වියළිලා ගිහින් ඇස කඳුළු කෝ දැන් දුකට
ඉකි ගසා හඬන විට නෑසෙන්න හඬ පිටට
හිස වටා විදුලි ගිණි පුපුරණවාද කොහෙද
මහ කඳුත් නාය යයි දරාගත නොහැකි අවසන
ඉතින් මම, මගෙ හිත කවුද ඒත් ඒක්කල බැලුවම
සිනාසී නුඹ බලා ඉන්නවා සිහිනයක මම දැක්කම
හිත සසල වී රිදෙන අන්දම පුදුමයක් නැහැ නේද
උඩහ පැත්තට වැහි වැටෙන විට ගඟ දෝරෙ යයි රුදුරු
පහළ වතු පිටි ඉවුරු බිඳිමින් ගලා යයි හැකි අයුරු
කුණාටුව මැද මටත් හැකිනම් එලෙස වන්නට රුදුරු
ඒත් කොහොමද මතක් වෙන්නෙම නුඹෙ සිනා මුව සොඳුරු
සමහරු
ඉවසලා ඉවසලා අවසන
ජීවිතය හැර ගියහ
තවත් සමහරු
පිස්සන් බවට පතව
අනෙකා එන තුරා
තවමත් මග බලා සිටින්නෝය
තවත් සමහරු
කිසිවක් සිතාගත නොහැකිව
මග නැවතී සිටින්නෝය
ඇත්තේ පෙර කී අවස්ථා දෙක පමණි
නුඹ නොමැති දවස්
තිබුණාද මතක නෑ මෙතෙක්
නුඹ රැඳුණු හිතත්
නුඹ කොහිද ඇසුවෙ නෑ තවත්
තනිව සිහිනෙකවත්
සිතන්නත් බය හිතෙන හවස්
පිරී හිස්වෙන වීදුරු
කෙලෙස දුරුකරයිද හිඩැස්
කොතැන හෝ ඉඳ අදත්
හිනැහෙන්න සිත තුටින්
විඳින විට ජීවිතය ටිකක්
විඳවීම් අමතකව යන ලෙසින්
කඳුළු සිරවුණු දෙනෙත්
සොයන විට නුඹ කොතක්
ඇය තුටින් නම් ඉතින්
කඳුළු (මට) වද නොඳී ඉඳපන්
